Hy het jou bekend gemaak, o mens, wat goed is; en wat vra die HERE van jou anders as om reg te doen en liefde te betrag en ootmoedig te wandel met jou God? Miga 6:8
Beste Vriend
Wanneer teëspoed jou tref, kom jy voor deurslaggewende keuses te staan. Jy kan toelaat dat bitterheid jou verteer, sodat die negatiewe gebeure jou kan definieer en vernietig. Jy kan vasgevang bly in die verlede, smag na “die goeie ou dae”. Alternatiewelik kan jy kies om diep asem te haal en weer op te staan. Soms beteken opstaan om teen alle kanse aan hoop vas te klou en jouself in geloof te anker. Dit is die oomblik om die kampioene rondom jou op te soek - diegene wat jou reis na heelheid en welstand sal ondersteun. Filippense 4:13: Tot dit alles is ek in staat deur Hom wat my krag gee. My gebed. HERE, ek glo U gee my hoop en krag in elke situasie. Dankie vir die wysheid wat U voorsien, ek weet dat Psalm 121 waar is in my lewe. U is die Een wat oor my waak en my beskerm. Here, ek bid vir my medegelowiges wat te midde van swaarkry en storms is. Gee hulle asseblief krag en maak 'n pad vir hulle waar dit lyk of daar geen uitkoms is nie. Ek bid ook vir U Vrede wat alle verstand te bowe gaan om oor ons land te kom sodat leiers keuses kan maak ten bate van die mense wat hulle dien. Ek bid dit in die Naam van Jesus. Amen. Jy is tot alles in staat deur Christus wat jou die krag gee.
Ds Wynand en Dr Barbara Louw
Inter Trauma Nexus
info@itn.org.za
0837001441
Posbus 165, Garsfontein, 0042
